LA UNION – Mangisay-sayangkat ti naun-uneg nga imbestigasyon ti Civil Aviation Authority of the Philippines (CAAP) seknan iti napasamak a panagsuwek ti maysa a Cessna training airplane iti narabaw a paset ti kabaybayan a sakop ti Barangay Canaoay, San Fernando City, La Union.
Nupay awan ti natay iti nasao a plane crash a napasamak idi agsapa ti Martes (May 21), ngem nagpasar ti pannakadun-dunor iti flight instructor a ni Captain Elcid Tolentino ken student-pilot a ni Rafael Percival.
Dagus a naiturong dagitoy iti ospital ditoy siyudad babaen kadagiti nagresponde a medics manipud Coast Guard North-Western-Luzon Medical Team kadwa da ti City Disaster Risk Reduction Management Office (CDRRMO).
Iti agdama, addan iti nasayaat a kondisyon dagiti biktima.
Maipalagip a ti nasao a Cessna plane ket nag-take off idiay Canaoay Airport, agarop alas 9:30 ti bigat idi May 21, 2024 ngem kalpasan ti sumagmamano laeng a minuto, nag-emergency landing ti piloto a nakadunoran da iti student pilot idi nagsuwek ti eroplano.
Iti met Cesna Plane 172 ket nagpasar ti pannaka-dadael.
Kabayatanna, dagus a nangimuntar ti Marine Environmental Protection Unit iti dua a i 25 meters Oil Spill Boom iti aglawlaw ti eroplano tapno maprebentaran iti posible nga oil spill manipud iti nagsuwek a cessna plane.
Iti nasao a training plane ket mapapati a kukua ti Leading Edge International Aviation training Center.
