Nainget a pinaglibakan ti Palasyo ti Malacañang nga i-dodownplay ti gobierno iti agdama a sitwasyon mainaig ti panagngato ti presyo ti langis.
Segun kenni Palace Press Officer Undersecretary Claire Castro, nalawag nga awan ti krisis iti supply ti petrolyo iti pagilian, gaputa iti mapaspasaran ket ti price disruption nga ingubuay ti rinnupak idiay Middle East.
Impaganetget ni Castro nga ar-aramiden ti gobierno iti amin tapno masigurado a saan nga agkurang iti supply ti krudo, fuel, ken makan.
Nakasagana dagiti ahensia ti gobierno kas iti DOE, DA, ken DSWD tapno mangipaay ti tulong ken siguraduen a saan a marikna dagiti umili iti panagkurang.
Uray ngumatngato ti presio ket tarigagay ti presidente a kabaelan ti gobierno a protektaran dagiti umili.
Aminado ni Castro a saan a maliklikan a maapektaran iti Pilipinas iti krisis idiay Middle East, isu a nagpanawagan isuna ti panagtinnulong ken panagtipid no kasapulan.
Iti agdama, agtultuloy nga agpursige iti DOE iti panangidaulo ni Secretary Sharon Garin a saan nga agkurang iti supply ti langis iti pagilian.
Imbinglay na pay nga addaan ti negosasyon ita iti nadakamat nga ahensia para ti 440,000 barrels ti fuel ken addaan met ti 600,000 barrels ti langis iti mabalin a maangkat.###
