LA UNION – Kinumpirma ni Kapitana Arlene Abat ti Barangay Talogtog, San Juan, La Union a nakasangpeten ditoy Pilipinas, idi aldaw ti Sabado, Hulyo 30, 2022 iti maladaga, nga anak ti OFW a natay a nagpasngay idiay pagilian a Taiwan.
Segun kenni Abat, dagiti kameng ti Overseas Workers Welfare Administration wenno OWWA idiay Manila iti kangrunaan a nangasikaso iti papeles ti ubing ken nangsabat idi simmangpet da iti airport.
Nagbalin a natalged ken nasalun-at ni Baby Girl a simmangpet ditoy Pilipinas.
Maipalagip a ni Sheryl Cabanban, 28-anyos, ket nagtrabaho kas maysa a factory worker idiay Taiwan sipud tawen 2017.
Daksanggasat a pimmusay idi June 18, 2022 idi nagpasngay iti uneg ti dormitoryo daytoy, gaputi maipagarop a blood loss wenno adu a dara iti nagsayasay kenkuana.
Segun kenni Abat, sumaruno a maasikaso iti pannakaiyawid ti bangkay ni Sheryl manipud Taiwan, a manamnama a maisangpet inton Agosto 17.
Nabang-aran iti pamilya Cabanban iti pannakaiyawid ti maladaga manipud Taiwan.
Mainaig ti daytoy, dinakamat ni Nestlie Dulay iti maysa nga N.G.O. wenno non-government organization a timmulong kadakuada para iti pannakai-proseso dagiti kasapolan a papeles iti panangiyawid ti maladaga.
Emosyunal met a pinagyamanan ni Nestor Cabanban dagiti lokal nga opisyal ti ili a San Juan a pakairamanan ni sigud a Gobernor Pacoy Ortega, gaputi nagbalin a tulong dagitoy para iti pannakaiyawid ti maladaga ken sumaruno iti pimmusay nga anak na a ni Sheryl Cabanban.
