LA UNION – Kinumpirma idi kalman iti lokal a gobyerno ti ili a Bacnotan, La Union iti umuna a kaso daytoy iti African Swine Fever wenno ASF.
Daytoy ket kalpasan a naawat iti Municipal Agriculture Office iti positibo a resulta iti blood sample iti sumagmamano a baboy a naipasidong iti blood sampling, manipud iti 2 a barangay.
Iti pannakiuman ti Bombo Radyo La Union kenni Municipal Agriculturist Dra. Divina Gracia Apigo, kinunana a dagiti dua a barangay a nagpositibo iti ASF ket iti Brgy. Ubbog ken Brgy. Maragayap.
Kinuna ni Dra. Apigo, a maisayangkat iti culling operation manipud ground zero agingga 500 meter radius idiay Brgy. Ubbog, partikular iti Purok 2, Purok 3 ken sumagmamano a parte iti Lower Paagan ken manipud met iti ground zero agingga 500 meter radius idiay Brgy. Maragayap agingga iti sumagmamano a paset ti Barangay Nangalisan.
Kabayatanna, naamwan ti Bombo Radyo La Union kenni Barangay Chairperson Pacita Lemi ti Brgy. Ubbog a nangrugi ita nga aldaw ti Miyerkoles iti culling operation kadagiti baboy.
Nakurang nga 400 a baboy iti maikali ken aganay 50 nga agtartaraken ti baboy iti apektado kadagiti uppat a nadakamat a barangay.
Ti ili a Bacnotan ti maika 13 a lugar ditoy probinsiya a nastrek iti ASF.
