LA UNION – Naan-anayen a nakarwar iti Philippine Area of Responsibility (PAR) ti bagyo Aghon.
Segun iti PAGASA, ti sigud a bagyo Aghon nga addaan ti international name nga EWINIAR, ket naudi a nasaripatpatan iti kaadayu 1,205 kilometro daya amianan-a-daya ti Extreme Northern Luzon.
Kabuyog daytoy iti kapigsa ti angin a 120 kilometro kada oras ken kapegges a dumanon agiongga 150 kilometro kada oras.
Napaspas latta nga agtur-turong iti amianan-a-daya iti 35 kilometro kada oras.
Dup-dupagenna iti abagatan a paset ti Japan.
Kabayatanna, iti uneg ti tallo nga aldaw nangrugi ita, ket agtalinaed a makapadas ti nakuyem a panawen, mawaras-waras a panagtudo ken panaggarru-od dagiti lugar idiay Metro Manila, Ilocos Region, Central Luzon, CALABARZON, MIMAROPA, Western Visayas, Zamboanga Peninsula, Basilan, Sulu, ken Tawi-Tawi gaputi agraraira a Southwesterly Windflow.
Iti Frontal System ken Lozacalized Thunderstorm ket mangigubway met laeng ti mawaras-waras a panagtudo ken panaggarru-od iti nabatbati a paset ti pagilian.
