BR LA UNION – Agtultuloy a banbantayan ti weather bureau iti Tropical Storm Jangmi nga adda pay laeng iti ruar ti Philippine Area of Responsibility (PAR).
Maibasar iti latest weather bulletin ti PAGASA, naudi a nasaripatpatan iti sentro ti bagyo iti kaadayu a 1,235 kilometro daya ti Southeastern Luzon.
Kabuyog ti bagyo iti kapigsa ti angin a 75 kilometro kada oras asideg iti sentro ken kapegges a dumanon iti 90 kilometro kada oras.
Iti agdama, dup-dupagen ti bagyo iti pa-amianan amianan-a-laud ngem nabuntog ti garaw daytoy.
Kabayatanna, makaapektar iti panawen ti pagilian iti agraraira a southwesterly windflow, a mangigubway ti nakuyem a tangatang ken panagtudo idiay Palawan ken lumaod a paset ti Visayas ken Mindanao.
Malaksid dayta, ti trough ti Tropical Storm Jangmi ket maka-apektar iti nabatbati a paset ti Mindanao, a mangigubway ti panagtudo ken thunderstorms iti sumagmamano a lugar.
Laksid nga awan pay iti direkta nga epekto iti pagilian ti nasao a bagyo, mabalakadan ti publiko nga agtalinaed a nakatutok iti abiso dagiti eksperto seknan iti weather disturbance.
