Nangrugin a kumapsot iti Bagyo Rosal, manipud Super Typhoon ket nagbalinen a Typhoon ti kategorya na, bayat nga agtultuloy ti panaggaraw na iti Philippine Sea, daya ti ng Batanes.
Iti 5:00 PM bulletin ti state weather bureau, naudi a nasaripatpatan iti sentro ti mata ti bagyo iti kaadayu a 350 kilometro, daya ti Itbayat, Batanes.
Kabuybuyog na ti angin a 165 km/h asideg iti sentro ken kapegges a dumanon iti 205 km/h.
Dup-dupagenna iti amianan-a-palaud iti kapartak a 15 km/h.
Nakabayog pay laeng ti tropical cyclone wind signal no. 2 idiay Batanes ken northeastern portion ti Babuyan Islands (Babuyan Is.)
Bayat a ti tropical cyclone wind signal no. 1 ket nakaibayog idiay: nabatbati a paset ti Babuyan Islands, mainland Cagayan, northeastern portion ti Isabela (Maconacon, Divilacan, Santa Maria, Cabagan, San Pablo, Palanan), Ilocos Norte, ken Apayao.
Iti forecast track, umas-asideg ti bagyo rosal iti Extreme Northern Luzon ken namnamaen a rumwar iti Philippine Area of Responsibility (PAR) inton bigat ti rabii wenno bigat ti Sabado.
Iti sumaruno a 24 nga oras, namnamaen nga agtultuloyen ti panagkapsot na agingga iti severe tropical storm inton Sabado, Oktubre 24, 2026.
