Nakalasaten ita nga aldaw ti Martes, Hulyo 22 iti makin-amianan a paset ti kabaybayan ti Vietnam iti bagyong Wipha (sigud a Crising) ken imet iti tudo a mabalin a mangigubway ti panaglayos ken landslide.
Segun iti national weather forecast agency, addan iti 60 kilometro manipud iti siyudad ti Haiphong iti bagyo. Kabuyog na iti angin a dumanon iti 102 km/h ken agdaldalyasat iti pa-Laud a direksion iti kapartak a 15 kilometro tunggal oras.
Manamnama nga aglandfall daitoy kadagiti probinsya ti Hung Yen ken Ninh Binh ita a rabii ken kumapsot kas Low Pressure Area (LPA).
Awan pay iti naipadamag a perdisyon wenno casualties iti agdama.
Impasidong ni Vietnam Prime Minister Pham Minh Chinh iti state of emergency dagiti coastal provinces kas panagsagana iti nasao a bagyo.
Kabayatanna, nasurok a 350,000 dagiti naka-stanby a suldado bayat a nakanselar ken naiyalis iti schedule dagiti sumagmamano a byahe iti tangatang, tren, ken puerto.
Maipalagip nga idi napalabas a tawen, naduprak iti nasao a pagilian ti Typhoon Yagi a nakatayan dagiti nasurok-kumurang 300 nga indibidwal ket nangibati ti perdisyon nga aggatad ti $3.3 billion.#
