LA UNION – Nabigbig ti Bakawan Eco-Tourism Park ti Bauang iti national level kalpasan a nainaganan daytoy a 3rd Runner-Up iti Best Mangrove Award iti Para El Mar 2025: National Coastal and Marine Resource Management Awards a naangay idiau Siudad ti Iloilo.
Inawat ni Mayor Clarissa T. Lee ti pammadayaw, agraman iti delegasion ti Bauang a buklen da Florence Rulloda, Municipal Planning and Development Coordinator (MPDC); Wilson Samuel C. Caluza, Municipal Administrator for Operation; Marc Alvin Garcia, Municipal Environment and Natural Resources Official (MENRO); Ricardo A. Navarro, Jr., Tourism Operations Official; ken ni Ms. Diana May Abubo.
Agserbi ti Bakawan Eco-Tourism Park kas modelo a proyekto a mangipakpakita iti naballigi a panagtitinnulong ti lokal a gobierno, barangay, ken dagiti partner organizations tapno mapreserba ken mapasayaat dagiti mangrove ken pakabuklan nga aglawlaw.
Impannakkel ni Mayor Lee iti nasao a pammadayaw ken impaganetget a pammaneknek daytoy iti agtultuloy a panagregget ti ili a mangsalaknib iti aglawlaw nga mailunglungalong dagiti programa a makatulong iti aglawlaw ken mangparnuay iti pagbiagan dagiti umili ken turista.
Babaen ti pananggun-od ti Bauang iti pammadayaw, ad-adda a napatibker iti saad da kas maysa a mangidadaulo nga ili iti tay-ak ti eco-tourism ken environmental stewardship nga agserserbi a kas inspirasion para kadagiti dadduma a lokal a gobierno a mangipampamaysa iti sustainable development ken konserbasion dagiti natural resources.
