LA UNION – Impannakkel ni Jail Inspector Julius Palada, agdama a jailwarden idiay Balaoan District Jail, iti baro a programa dagitoy a “Seedlings for Life.”
Daytoy ket panagmula iti naduma-duma a klase ti nat-nateng iti backyard wenno likod a paset ti nasao a pasilidad, partikular iti Pechay.
Iti eksklusibo a pannakiuman ti Bombo Radyo La Union kenni Palada, kinuna na a naipanawen ti nasao a programa, agsipudta kangina ita ti magat-gatang a pakairamanan dagiti nat-nateng.
Malaksid a maaddaan da iti sadiwa a nateng ken nasalun-at a taraon, makatulong da pay kadagiti tattao nga asideg iti pasilidad a maikkan iti seedlings wenno napagtubo a bukel, tapno adda met ti imula ken pagnumaran dagitoy.
Malaksid iti pechay nga isu ita ti kangrunaan a mula ti Balaoan District Jail, plano da nga agmula kadagiti nat-nateng a nadakamat iti kanta a “Bahay Kubo.”
