LA UNION – Nangisayangkat ti tree planting dagiti kameng ti Bureau of Jail Management and Penology (BJMP) nga indaulwan ni Jail Inspector Julius Palada, agdama a jailwarden idiay Balaoan District Jail kas paset iti advocacy dagitoy a panangsalwad iti aglawlaw.
Naamwan ti Bombo Radyo nga aganay 10 a mahogany seedlings iti naimula iti igid ti Ar-arampang Eco Dam idiay Barangay Ar-arampang, Balaoan, La Union idi kalman, Pebrero 25.
Kabinnulig ti BJMP Balaoan iti naiganwat a tree planting dagiti miyembro ti Sangguniang Kabataan ken Barangay Tanod iti nadakamat a barangay.
Maipalagip a maysa pay nga ipan-pannakkel a proyekto ti Balaoan District Jail ket iti “Seedlings for Life” wenno panagmula iti naduma-duma a klase ti nat-nateng iti arubayan wenno likod a paset ti nasao a pasilidad.
Malaksid a maaddaan da iti sadiwa a nateng ken nasalun-at a taraon, makatulong da pay kadagiti residente nga asideg iti pasilidad a mabunongan iti bukel wenno seedlings nga imula met iti arubayan dagitoy.
