BALAOAN, LA UNION – Nangipaay iti Balaoan Municipal Police Station (MPS) dagiti napapateg a palagip tapno maliklikan iti insidente ti kidnapping, nangruna kadagiti ubbing ken agtutubo iti komunidad.
Segun kadagiti otoridad, masapul a liklikan ti panagsurot wenno panagangkas kadagiti estranghero wenno saan nga am-ammo, uray pay no agparangda a naimbag, gapu ta mabalin daytoy a mangiturong iti peggad.
Ugalien nga i-update iti nagannak wenno guardian no adda ti papanan. Masapul nga ipakaammo iti lugar, oras ti panagawid ken dagiti kakadua, tapno adda ti mabalin a mang-monitor ken tumulong no adda ti saan a manamnama a mapasamak.
Ugalien nga adda ti kadua tapno saan nga agmaymaysa agsipudta kadawyan a pilpilien dagiti kriminal dagiti biktima nga agmaymaysa.
Innayonda pay a saan dagus nga agtalek iti saan nga am-ammo ken liklikan ti panangibinglay ti personal nga impormasion kas iti address wenno numero, gapu ta mabalin daytoy a mausar iti dakes a panggep.
Kabayatanna, mensahe ti Balaoan MPS iti publiko a kanayon nga agbalin nga alerto ken responsable iti panangsalaknib iti bukod a kinatalged tapno malapdan iti aniaman a krimen iti komunidad. (Report by Bombo Jordan)
