(Update 2) LA UNION – Adda itan iti salwad ti pulisya ti maysa pay a 16-anyos a balasitang a biktima ti human trafficking kalpasang nga inlako daytoy iti manager ti maysa a videoke bar idiay syudad ti San Fernando, La Union.
Iti naisayangkat a follow-up operation ti San Fernando City Police Office, nakumpirma ti darum dagiti lima nga immuna a naisalakan a babbai a biktima met laeng ti human trafficking a maysa kadagiti kadduada iti videoke bar ket inlako iti manager-da iti pagdana met laengen a mangimatmaton iti maysa a balay-pagraragsakan.
Sigun ti nasao a balasitang, inlako isuna iti suspek a ni Sherylyn Lim iti kantidad a P10,000.
Maipagarup a nagpaay kas katulong ti biktima iti balay ti barona nga amo, ngem saanna a maaw-awat ti sweldona.
Maragsakan met ti balasitang idi nga innala isuna dagiti pulis manipud ti pagpapaayanna a balay gapu ta kayatnan iti agawid idiay pagtaenganda idiay Pagadian City.
Kabayatanna, agtutuon met a kaso iti mabalin a sanguen ni Lim kas iti panaglabsing ti Anti-Trafficking in Persons Act of 2003 wenno Republic Act 9208, grave treath, ken falsification of documents gapu iti panangpeke kadagiti dokumento dagiti biktima.
Ad-adalen met ti pulisya iti kaso a maidatag kontra ti gimmatang iti nasao a balasitang.
