LA UNION – Dimmapo iti aganay 80 porsiento ti maysa a balay idiay Barangay Samara, Aringay, La Union a kukua ti managan Conrado Cariño, 66-anyos.
Napasamak ti uram agarop alas 9:20 ti bigat ken naideklara a fire out iti oras ti alas 9:55 ti bigat.
Iti pannakiuman ti Bombo Radyo La Union kenni FO3 Gener Dulay ti Bureau of Fire Protection-Aringay, dagus da a nagresponde iti report ngem kinuna na a napaspas a nagwaras ti apoy gaputa naaramid iti light material ti balay .
Base iti inisyal a report, maipagarop a ti panangay-ayam ti lighter iti 3-tawen na nga ubing nga apo ni Cariño iti makunkuna a nangrugyan ti uram, partikular iti maysa a kuwarto ti balay.
Karaman a dimmapo iti appliances, bad-bado, ken dadduma pay nga alikamen iti balay.
Nupay kasta, awan ti nailista a nasugatan iti insidente.
Segun kenni Dulay, agtultuloy ti imbestigasyon iti kaso tapno maamwan ti pakabuklan a danyos iti napasamak nga uram.
