LA UNION – Agtultuloy pay laeng a dukduktalen ti Bureau of Fire Protection (BFP) ti rason ti enteremente a pannakauram ti balay ti maysa a barangay tanod idiay Brgy. Palugsi-Limmansangan, Bauang, La Union itay agsapa.
Ti nasao a balay ket kukua ni barangay tanod Abraham Gapasin iti Zone 7.
Iti pannakiuman ti Bombo Radyo ken ni Kagawad Condrado Llaneras, agalas-11:00 ti agsapa idi nadlawda ti napuskol nga asok iti nangato a paset ti nasao a barangay isu a dagusda a nagtitinnulong a nangsebseb iti apoy.
Nupay kasta, saanda daytoy a nagebgeban gapu ta napaspas a nagwaras ti uram.
Naamuan nga awan iti balayda ti makinkukua idi napasamak ti insidente.
