LA UNION – Sumangsango iti sabali manen a kaso a panaglabsing ti RA 9165 iti maysa a balud iti La Union Provincial Jail kalpasan a maipagarop a nabalunan ti iligal a droga, partikular ti shabu.
Iti eksklusibo a pannakiuman ti Bombo Radyo La Union kenni Prison Guard-2 Jun Marc Camarao, kinuna na a kas paset ti ar-aramiden da a panangsukimat wenno inspection kadagiti mait-ited a balon kadagiti inmates ket naduktalan da, a napakuyugan ti iligal a droga iti balon a para iti managan Richard Tangalin, 38, ti Barangay Camiling, Balaoan, La Union.
Segun kenni Camarao, maysa a lalaki iti nangitulod iti maysa a paper bag a naglaun iti 2 a lunch box iti naluto a karne ti baboy ken manok, powder a paglaba, fabcon, ken maysa a roll-on deodorant, a para kenni Tangalin.
Naduktalan iti maysa a sachet ti maatap a shabu a nabalkot ti kapas ken naikarga iti uneg ti nasao a roll-on deodorant.
Nupay kasta, nainget a pinaglibakan ti suspek a kukuana ti iligal a droga ken kinuna na pay a saan na nga am-ammo iti tao a nangitulod iti nasao a paper bag.
Ni Tangalin ket nabalud gaputi kapada met laeng a kaso nga adda pakainaigan na iti panagikot ti illegal drugs kalpasan a naarestar idi Marso 3 agdama a tawen babaen ti Bacnotan Police Station.
