LA UNION – Nangidatagen ti kaso a kriminal iti Department of Interior and Local Government (DILG) idiay Office of the Ombudsman kontra kenni Bamban, Tarlac Mayor Alice Guo gapu iti pannakairamanna iti maipagarop nga iligal nga operasyon ti Philippine Offshore and Gaming Operator (POGO) iti nasao a lugar.
Segun kenni DILG Undersecretary for External, Legal and Legislative Affairs Juan Victor Llamas, idi pay Mayo 24 nga indatag da iti kaso idiay Ombudsman kontra kenni Guo iti sidong ti Anti-Graft and Corrupt Practices Act wenno Republic Act No. 3019.
Kinuna ni Llamas, saan nga imbabawi ni Guo iti business permit ti POGO kalpasan a nagpaso iti lisensiya na iti PAGCOR.
Malaksid kenni Guo, adda pay ti sumagmamano a local officials ti nairaman iti reklamo.
Iti agdama, maim-imbestigaran pay laeng ni Guo gaputi pannakairaman na iti Zun Yuan Technology Inc., a naraut idi Marso gaputi reklamo a human trafficking and serious illegal detention.
Immuna nga inrekomenda ni DILG Secretary Benhur Abalos a suspindiren ni Guo kas mayor idiay Bamban, Tarlac.
