LA UNION – Nasarakanen ti bangkay ti maysa a lalaki a pinapatay ti bukodna a kabsat idiay Brgy. Quirino, Bacnotan, La Union idi rabii.
Immuna iti daytoy, inaklon ti simmuko a suspek ken maysa a partidor a ni Jeric dela Cruz nga imbatina iti igid ti baybay ti bangkay ti manongna a ni Jeffrey kalpasan a binagbagsolna.
Iti pannakiuman ti Bombo Radyo ken ni PCI Reynaldo Soria, hepe ti Bacnotan Police Station, inlanad kadakuada ti suspek a bayat ti panaginom dagitoy idi rabii ket ginandat ida a bagbagaan ti manongna.
Nupay kasta, nagpalting ti panagdengngeg daytoy ken gapu iti nalaus a kinabartek ket binagbagsolnan ti kabsatna ken ingguyodna iti igid ti baybay ngem imbatinan sadiay ti bangkay.
Dagus met a nagturong dagiti pulis iti nakapasamakan ti krimen itay agsapa ngem gapu iti high tide ket saandan a nasarakan pay ti bagi ti biktima.
Pasado alas-8:00 idi naalaw met laeng manipud iti baybay ti bangkay ni Jeffrey.
Kabayatanna, naituring a maidatagan iti kaskenan a kaso ti suspek.
