LA UNION – Nayawiden idiay Brgy. Leones West, Tubao, La Union ken naituding a malamayan ti bangkay dagiti agkakabagian a natay iti panagdinnungpar ti van ken parapasahero a bus idiay Tarlac city a nakatayan ti innem a tattao idi kalman.
Nupay kasta, iti pannakiuman ti Bombo Radyo ken ni Jaime Lacuata, kabagian dagiti natay a pasahero, kinunana a dagus a maiturong idiay Baguio city tapno ma-cremate ti bangkay ti driver ti van a ni retired SPO4 Gemore Molina.
Inlanadna a daytoy ket gapu ta saanen a mabalin pay a maembalsamo daytoy gapu iti nakaam-ames a napagteng ti biktima.
Kabayatanna, dinakamatna met a maibasar iti pannakiumanna kadagiti dadduma a survivors ket kinuna dagitoy a saan a napaspas ti panagpataray ni Molina gapu ta pinakdaaran pay ti asawana nga agannad iti panagmaneho daytoy.
Maipalagip a naggapu pay idiay Bicol region tapno makilamay dagiti nakasakay iti van ket agawidda koman ditoy La Union idi napasamak ti aksidente.
