LA UNION – Pinatalgedan ni Barangay Kapitan Amming Jucar ti Brgy. Cadaclan ditoy syudad ti San Fernando, La Union a naka-lockdown iti lugar da, kasaruno iti panag-positibo ti African Swine Fever (ASF) dagiti adu a taraken a baboy sadiay.
Segun kenni Jucar, nairut iti maipatpatungpal a checkpoint iti lugar da ken nainget a binilin na dagiti barangay tanod a siguradwen nga awan ti makarwar ken makastrek a baboy iti masakopan da.
Maipalagip a nasurok 30 a baboy iti natay ken naikali iti ground zero kalpasan a nagpositibo dagitoy ti ASF, banag a pinatalgedan ti City Veterinarian ken kinumpirma met ti City Government ti San Fernando.
Immunan a siniguro ni City Veterinarian/Dr. Flocy Decena nga adda maipaay a financial assistance kadagiti hog raiser nga apektado ti ASF.
Segun kenkuana, pakabuklan nga P8,000 iti maited a tulong pinansiyal kas bayad iti kada baboy a mai-cull.
Manipud iti nasao a kantidad, P5,000 ket agtaud iti Dept. of Agriculture bayat a ti dua a sag P1,500 ket aggapo met iti city government ti San Fernando ken provincial gov’t ti La Union.
