LA UNION – Isagsaganan ti pulisya ti kaso a pammapatay kontra iti maysa a punong barangay a maipagarup a nangbagsol ti kasugalna kabayatan nga addada ti maysa a lamay iti minatay idiay Barangay Sucoc Norte, ili ti Luna, La Union.
Nabigbig ti suspek a ni Ronnie Reyes, 51, punong barangay ti nasao a lugar.
Base iti imbestigasyon ti Luna Police Station, kabayatan nga agay-ay-ayam iti baraha ti suspek ken ti biktima a ni Jojo Asuncion, 30 kaddua iti dadduma pay a nakilamay ket maipagarup a timmanor iti susik ti baetan iti dua.
Gapu iti daytoy, maipagarup a binagsol ti suspek babaen iti kutsilyo ti biktima.
Natay ni Asuncion kabayatan a maag-agasan idiay ospital, ken naaresto met iti otoridad ti nadakamat nga opisyal ti barangay.
Agtaltalinaed iti detention facility ti Luna Police ti suspek kabayatan a maur-uray iti pangngeddeng ti korte maipapan iti kaso daytoy.
