LA UNION – Madama ti panangisayangkay iti imbestigasyon ti pulisya maipapan ti pannakatay ti barangay chairman a karaman ti narco-list idiay Barangay Maoasoas ili ti Pugo, La Union agarup ala-1:00 itattay malem.
Nabigbig ti 63-anyos a biktima a ni Kapitan Ruben Genetiano ti Barangay San Jose, Rosario, La Union.
Base ti nakalap nga impormasyon ti Bombo Radyo manipud ti Pugo Police Station, kabayatan a kasarsarita ti kapitan ti karpentero iti maysa a maar-aramid a balay ket maipagarup nga inaseggan daytoy ti saan pay a nabigbig a suspek a nakalugan ti kotse kasaruno ti pammaltog.
Dead on arrival idiay Rosario District Hospital ti biktima gapu iti tama ti bala iti ulo daytoy.
Ni Genetiano ken addaan ti pending cases idiay korte nga addaan ti pakainaigan ti panagikot iti iligal a droga ken illegal possession of firearm.
