Natay ti maysa a barangay chairman ken dua a konsehal bayat a kritikal met ti kasaad ti Sanguniang Kabataan (SK) secretary kalpasan a paltogan ti barangay kagawad kabayatan ti flag ceremony sadiay Barangay Salitran ita nga aldaw ti Lunes, Mayo 26.
Binigbig ti kapulisan dagiti pimmusay nga isuda Raul Atarde Ballos, 56-anyos, barangay chairman; Jose Lagones, 65-anyos, konsehal; ken ni Marvin Cañete, 54-anyos, konsehal; ken ti nadundunor nga SK secretary ket ni Christine Joseph Bonus.
Segun kenni Police Lt. Colonel Regino Oñate, acting chief ti Dasmariñas City Police, ti suspek ket ni alias ‘Ariel,’ 50-anyos, sigud a barangay watchman.
Inasikgan na ni Ballos manipud ti likudan daitoy ken immuna a pinatay na babaen ti pammaltog. Kasaruno na ket pinalpatogan na pay dagiti dua a konsehal iti baranggay ken iti kangitingitan ti komosyon ket kellaat a pinaltogan iti suspek ti bagbagi na.
Kabayatanna, dagos met a naiturong iti ospital dagiti biktima ken iti suspek nga agpapada a naideklara kas dead on arrival bayat a ti SK secretary met ket adda iti kritikal nga kondisyon.
Imbilin ita ni Regional Director PBGen. Paul Kenneth Lucas ti nauneg nga imbestigasyon iti insidente tapno madakamat ti motibo ti suspek ken mapagsungbat ti siasinoman a nagbasol.
Daitoyen ti maikadua a dakkel nga insidente ti pammaltog iti nasao a probinsya ti las-ud laeng ti dua nga aldaw.
Sakbayna ket idi aldaw ti Sabado, nu sadino ket maysa a 48-anyos a tagasuporta ti Mayor ti Naic, Cavite ti pinaltogan da ti sanguanan mismo ti balay da a, banag nga adda met ti pakainaigan na iti nabiit pay a midterm elections.
