LA UNION – Dead on arrival idiay ospital ti maysa a punong barangay kalpasan a maaksidente ti manmanehuen daytoy a motorsiklo iti kawatiwatan ti Major Marcos Highway idiay Barangay Nalvo Norte, ili ti Luna, La Union.
Nabigbig ti biktima a ni Kapitan Remegio Nuesca, 51, residente ti Barangay Busel-busel ti nasao nga ili.
Naammuan ti Bombo Radyo manipud iti Luna Police Station, kabayatan a patpatarayen ti biktima ti bukodna a lugan ket maipagarup a napukawan daytoy iti kontrol ti panagmaneho kasaruno iti pannakaidungpar ti kasinnabatna a sabali pay a motorsiklo a nakaparada iti igid ti kalsada.
Natay ti kapitan gapu iti nakaro a sugat a nilak-am daytoy iti naduma-duma a paset ti bagina.
Makilamay koma ti biktima idi a napasamak ti aksidente.
