Naballigi a naisayangkat idi Setyembre 2, iti Barangay Health Workers (BHW) Summit 2026 nga addaan tema a “Leading with Heart, Navigating to Wellness” idiay Speaker Pro Tempore Francisco I. Ortega Convention Center, Brgy. Sevilla, Ciudad ti San Fernando, La Union.
Dinar-ayan daytoy dagiti Barangay Health Workers (BHWs) manipud iti 19 a munisipalidad ken 1 a ciudad iti intero a probinsia ti La Union, no sadino naisayangkat met iti pammadayaw ken panangbigbig iti napateg nga ambag iti serbisio ti pangsalun-at kadagiti komunidad.
Maysa kadagiti napadayawan kas Top 10 Outstanding BHWs ditoy La Union ni Marilyn Osias, BHW President ti Barangay Lettac Sur, Santol.
Naglaok a ragsak ken nerbios iti narikna na idi naipaisidong isuna iti validation interview sakbay napili kas maysa kadagiti naisangsangayan a BHW iti probinsia.
Segun kenni Osias, iti tengnga ti validation interview ket nagbalin isunan a komportable iti panangsungbat kadagiti damag, partikular kadagiti saritaan maipapan iti salun-at ken serbisio nga ipapaay da kadagiti kabarangayanda.
Para kenni Osias, saan laeng dagiti residente a sakop ti sitio wenno purok na iti pagserserbian na. Kinuna na, basta agkasapulan ti serbisio na ken addaan karit ti pangsalun-at, nakasagana isuna nga apan ken tumulong – nupay madanon isunan ti tengga’t rabii.
Maysa kadagiti saan na a malipatan a kapadasan kas BHW ket idi gastayan a nagpaanak ti masikog a dandanin nga agpasngay bayat nga agturong iti ospital. Gapu iti kinakurang ti espasio iti lugan ken babaen ti balakad na, naidanon latta ti ina iti panaganak na iti ospital.
Dakkel a tulong met para kenni Osias iti naawat na a ₱25,000 kas paset ti pammadayaw nga inted kadagiti Top 10 Outstanding BHWs. Kinuna na, agserbi daytoy kas kanayunan nga inspirasion tapno lalo da pay a pasayaaten iti serbisio da iti komunidad.
Naragsak met ni Osias a mabigbigbigen ken maik-ikkanen dagiti BHWs ti pammadayaw, nga agtultuloy a taktakderan iti serbisio da laksid ti bassit nga honorarium, rigat ken peggad a kadua ti trabahoda.
Mensahe ni Osias kadagiti kadapa na a BHW, saan nga agsardeng iti panangipaay ti serbisio laksid dagiti karit ti trabaho da.
Agtudo man wenno aginit, ken nupay madanon da ti rabii, agtuloy latta iti panangipaay ti serbisio para kadagiti kabarangayanda.
Nangipaay met ti mensahe ti suporta ken panangipateg ni La Union Governor Mario Eduardo C. Ortega kadagiti BHW, kas panangbigbig iti napateg a papel da kas kabinnulig dagiti health professionals iti pangsalun-at iti tunggal komunidad. (Bombo Jordan Colcol)
