LA UNION – Arestado iti anti-drug operation dagiti otoridad iti maysa nga aktibo a barangay kagawad ti Sagayad, San Fernando City, La Union.
Nabigbig iti suspek a ni Larry Estrella, 40, baro, residente ti nasao a lugar, ken maibilang a Top 9 drug personality iti provincial level.
Natiliw iti suspek babaen ti bileg iti search warrant nga inyetnag ni Executive Judge Imelda Cosalan ti MTCC Branch 1 San Fernando City, La Union.
Adda pakainaigan na daytoy iti panaglabsing iti R.A. 9165 wenno Comprehensive Dangerous Drugs Act of 2002.
Resulta iti naiganwat nga operasyon iti pagtaengan ti suspek, nakakumpiskar dagiti otoridad iti innem a selyado a plastic sachet a maipagarop a naglaun ti shabu ken naduma-duma a drug paraphernalia.
Mainaig ti daytoy, maisag-sagana ti kaso a panaglabsing iti Sections 11 and 12 iti R.A. 9165 maikontra iti nasao a barangay official.
Kabayatanna, agtaltalinaed daytoy iti kustodiya dagiti otoridad.
