LA UNION – Gaputi timpuar a susik iti baetan dagiti agkarruba ken agcabagyan, naapektaran iti dalan a pagna-an dagiti sumagmamano a residente iti maysa a purok idiay Barangay Bangcusay, San Fernando City, La Union.
Natungday met iti plano koma ti konseho barangay nga ipasemento iti nasao a dalan.
Iti panagturong ti Bombo Radyo Newsteam iti nasao a lugar, naimatangan iti nakabra wenno nakali a dalan, ket marigatan dagiti agnanaed iti nasao a lugar a dumalyasat.
Iti eksklusibo a pannakiuman ti Bombo Radyo kenni Dominador Rivera, kinuna na a mangted ti 1.5 meters a pagnaan dagiti residente. Ni Dominador Rivera iti mangibagbaga nga akinkukua iti nasao a dalan.
Kabayatanna, ni Fernando Rivera a kasinsin ni Dominador ken kaarruba na, iti maysa kadagiti mangirekreklamo iti pannaka-kali iti dalan a pagpagnaan dagitoy.
Kayatna sawen, susik iti sanikua ti nagramotan ti nasao a problema.
Mainaig ti daytoy, mangnamnama ni Barangay Kapitan Eddie Espenilla ti Barangay Bangcusay a maurnos ken marisot ti parikot iti nagbaetan ti dua a partido, babaen iti panagsasarita, ken saanen a dumanon pay iti korte.
Uray ni Barangay Kagawad John Martinez, ket tarigagayan na met a masolbar iti nasayaat a saritaan iti problema dagiti agcabagyan ken agkaka-arruba iti nasao a lugar.
