LA UNION – Mangrugi ita nga aldaw, Disyembre 2, 2020 ket maipasidong iti 14 days lockdown wenno Enhanced Community Quarantine (ECQ) iti intero a Barangay Pagdalagan Norte, San Fernando City, La Union gaputi ngimmatu a kaso ti covid 19.
Daytoy ket maiyannurot iti Executive Order No. 149-2020, nga impaulog ti lokal a gobyerno ti syudad ti San Fernando idi kalman, Disyembre 1.
Iti eksklusibo a pannakiuman ti Bombo Radyo La Union kenni Barangay Kapitan Nancy Trinidad ti Pagdalagan Norte, kinuna na a nangrugi ti panagwaras ti Covid 19 idi a maysa a barangay kagawad ti nagpositibo iti sakit.
Segun kenni Kapitana Trinidad, immuna a nagpa-swab test ti nasao a barangay kagawad ngem nagturong latta iti barangay hall, isunga naakaran na iti dadduma nga opisyal ti barangay, bhw, ken uray dagiti tanod a nakapolapol daytoy.
Kinuna ni Trinidad a naipasidong ti sibubukel a konseho barangay iti swab test idi Nobyembre 19 ket nagresulta daytoy iti panag-positibo iti dua nga Barangay Health Worker (BHW) ken dua a Barangay Kagawad.
Nupay kasta, iti agdama kunana ket maysa laengen a BHW iti agtaltalinaed a Covid 19 positive idinto a dagiti tallo ket negatibo metten iti umuna a covid test dagitoy, ngem kasapolan a maipasidong da pay iti maikadwa a test ken ag-negative sakbay a naan-anay a mapalubosan dagitoy a makarwar iti ospital.
Naamwan a maysa a 67-anyos a lakay a cabagyan ti maysa kadagiti nakaptan ti COVID 19 ket natay idi Nobyembre 30 gaputi komplikasyon iti sakit a COVID 19.
Iti agdama segun iti Kapitan, 18 dagiti aktibo a kaso iti barangay.
Naimuntar metten ti barikada iti amin nga entry ken exit points kadagiti pito a purok ti nasao a barangay tapno masiguro nga awan ti makaruar agraman dagiti empleyado iti gobyerno ken pribado a sektor, malaksid laeng kadagiti health workers ken frontiliners.
Kinuna pay ni Kapitan Trinidad nga isag-sagana metten ti City Disaster Risk Reduction and Management Office (CDRRMO) iti maibunong nga ayuda, partikular iti taraon ken danum, kadagiti amin a residente a na-lockdown, nga agpatingga inton Disyembre 15.
Immapela ni Trinidad kadagiti kalugaran na nga agtungpal kadagiti allagaden iti sidong ti ECQ agsipudta para met laeng daytoy iti pagimbagan da tapno ma-contain iti panagwaras ti makapatay a virus.
