Maysa a naayat ken napno ti ragsak nga aldaw iti insagana ti Barangay Paringao, Bauang, La Union para kadagiti umili inton Abril 30, 2026 iti Paringao Chapel Area, babaen ti “Barangay Paringao Wellness and Children’s Day” a kagiddan ti TODA Fuel Subsidy Distribution.
Mangrugi iti aktibidad manipud alas-6:00 agingga alas-8:00 ti bigat babaen ti Zumba session, a sarunoan ti panagrehistro para iti raffle dagiti ubbing manipud alas-9:00 agingga alas-10:00 ti bigat. Iti kangrunaan a programa ket maaramid manipud alas-10:00 ti bigat agingga alas-4:00 ti malem.
Karaman kadagiti tampok ti programa dagiti nadumaduma a parlor games, kids show agraman ti clown, magician, balloon twisting ken face painting, kasta met iti raffle draw. Adda pay ti kite flying contest nga addaan ti lima a pammadayaw, a kasapulan a dagiti saranggola ket inaramid dagiti makipaset ken naaramid laeng babaen ti recyclable wenno reusable a materyales.
Adda met ti libre a food station para kadagiti umuna a 100 nga ubbing nga addaan ti stub, a mangidiaya ti ice cream, French fries, scramble, fishball wenno kikiam, popcorn, hotcake, taho ken cotton candy.
Mainayon pay ti “Pamper Day” a mangited ti libre a pukis, manicure ken pedicure kadagiti umay a bisita babaen ti first come, first serve system.
Segun ti Barangay Council, iti nadakamat a selebrasion ita a tawen ket pinasimple gapu iti agdama nga economic crisis ken panagtulnog iti bilin ti lokal a gobierno ti Bauang maipanggep iti austerity measures ken energy conservation protocols. Gapu iti daytoy, saan a naangay dagiti kadawyan a dadakkel nga aktibidad a kas iti basketball tournament, Bancathon, Barangay Night, ken dagiti pageant.
Pinili ti barangay nga ikkan prayoridad dagiti napateg a kasapulan ti komunidad, agraman iti epekto ti panagngato ti presio dagiti produkto a petrolyo gapu iti riribok idiay Middle East.
Nupay kasta, panggep ti daytoy a simple nga aktibidad a mangipaay ti ragsak ken mangpabileg iti espiritu ti panagkaykaysa kadagiti taga-Paringao. (Report by Bombo Jordan)
Photo Courtesy: NaRaniag a Barangay Paringao (FB)
