LA UNION – Naipasidong iti nairut nga interogasyon iti maysa a barangay treasurer a maipagarop a mairam-raman iti kaso a vote buying idiay Barangay Ambaracao Sur, Naguilian, La Union.
Immuna ti daytoy, inaresto iti insayangkat a vote buying operation dagiti nagtipon puwersa a La Union Provincial Intelligence Branch (LUPIB), CIDG La Union, ken Naguilian Police Station iti suspek a nabigbig iti nagan a Daisy Dumangan, 40, addaan asawa, ken residente ti nasao a lugar.
Base iti nakalap nga impormasyon ti Bombo Radyo La Union manipud kadagiti maseknan, maysa a concerned citizen iti maipagarop a nag-tip kadagiti otoridad nga adda mapas-pasamak a vote buying iti nasao a lugar partikular iti barangay health center.
Dagus a nagresponde dagiti otoridad ket nagbalin a positibo iti impormasyon.
Nagresulta daytoy iti pannaka-kumpiskar ti 78 pidaso ti P500 bill wenno pakabuklan a P39-k, 17 pidaso ti P1,000 bill wenno pakabuklan a P17-k , 20 pidaso ti sample ballots ken dadduma pay a documento.
Iti suspek ket naipasidong iti custodiya dagiti otoridad para iti naun-uneg pay nga imbestigasyon.
