Ti napaay a gubat kontra droga ni sigud a Presidente Rodrigo Duterte ket mapapati a nakaigapuan ti kurapsion iti ranggo ti Philippine National Police (PNP) ken panagwaras ti impunity a nagresulta iti nasaknap a panagabuso iti human rights.
Daytoy ti kinuna ni Surigao del Norte 2nd District Representative Robert Ace Barbers, lead chairman ti House Quad Committee, a panangamong iti palawag ni Interior Secretary Jonvic Remulla nga inwagan ti dakkel a panagkukumplot iti uneg ti ranggo ti pulisya nu kasta ket takkaban dagiti illegal nga aktibidad, a kunana ket panawenen tapno mapagsungbat.
Segun kenni Barbers a chair ti House Committee on Dangerous Drugs, dagiti 30 police officials a naidarum nga pakairamanan ti dua a heneral mainaig iti parparbo a “drug haul” idi 2022 ket nalawag nga ebidensia ti maipagarup a sistematiko a panangabuso a nagtaud kadagiti pagalagadan ni Ex-PRRD.
Immunan nga imbaga ni Remulla a ti peke a drug haul, a pinagpammarang da a dakkel a balligi kontra droga, ket paset ti dakdakkel manen a sabwatan wenno panagkukumplot tapno mangilemmeng kadagiti illegal nga aktibidad ti intero a kapulisan.
Kinuna pay ni Remulla a mangisayangkat ti Department of the Interior and Local Government (DILG) iti imbestigasion kadagiti operasion mainaig iti droga manipud 2016 agingga 2022, a mangipamaysa ti reward system a naipalgak kadagiti hearings ti Quad Committee.
Sinegundahan ni Barbers ti kinuna ni Remulla a ti reward system ket nangiwaras iti kurapsion iti uneg ti PNP.
Impaganetget ni Barbers a dagiti nadarasudos a pagalagadan ni Duterte ti nangpataud iti perpekto a gundaway para iti panagkunniber.
Segun kenni Barbers, nasken a pagsungbaten amin dagiti responsable iti perdisyon a pinarnuay ti polisiya nga impatungpal ti administrasion ni Duterte.
Inawagan pay ti beterano a mammanday-linteg ti komprehensibo a reporma tapno malapdan ti binigbig na kas “culture of impunity” iti uneg ti kapulisan.
Intudo pay ti mammanday-linteg ti kinapateg ti mailasin a panagadal kadagiti reward systems, naing-inget a pagannurotan ti transparency kadagiti police operation, ken nadagdagsen a dusa kadagiti extrajudicial killings.
Segun kenni Barbers, ti pannakaipila ti kaso kontra kadagiti 30 nga opisial a nagkukumplot iti peke a drug haul ket rumbeng a mangirugi iti nalawlawa nga addang tapno mapagsungbat dagiti nagbasol.
