LA UNION – Nasugatan ti maysa a 19-anyos a barito kalpasan a tagbaten daytoy iti maysa a lakay idiay Barangay Sta. Rita West, ili ti Aringay, La Union.
Nabigbig ti biktima a ni Jimmy Aquino Jr.; kabayatan a nabigbig met ti suspek a ni Juan Nevirida, 60-anyos, agpada a residente iti nasao a barangay.
Base iti imbestigasyon ti Aringay Police Station, nagiinum ti biktima ken dagiti gagayyemna tapno rambakan iti kasangay daytoy idi a rimmaot ti suspek nga agpapagongga kasaruno iti pannagbat.
Naglak-am iti sugat ti naduma-duma a paset iti biktima ken dagus a naiturong idiay Caba District Hospital tapno maagasan.
Dagus met a naaresto ti suspek ken adda isuna iti kustodiya ti Aringay Police Station.
Kinuna met iti Bombo Radyo ni PSSg. Bonifacio Dacanay, imbestigador ti nadakamat a kwerpo ti pulisya, nakaluksaw ti lakay gapu iti kinaariwawa dagiti agiinum isu a natagbatna pay ti biktima.
Kabayatanna, addan iti nasayaat a kasasaad ti biktima ken nakarruaren daytoy iti ospital.
Maisagsagana metten ti kaso kontra iti suspek.
