LA UNION – Natay ti 16-anyos a barito a nagmaneho iti motorsiklo bayat a nadundunor ti backrider daytoy kalpasan a mairamanda iti aksidente idiay national highway a masakupan ti Bitalag, Bacnotan, La Union.
Nabigbig ti pimmusay a nagmaneho iti motorsiklo a ni Christian Joshua Rivera, residente ti Barangay Guinabang, Bacnotan; bayat ti backrider ket ni Archimedes Oredina, 21-anyos, agindeg iti Barangay Bitalag ti nasao nga ili.
Base iti inisyal nga imbestigasyon ti Bacnotan Police Station, maipagarup a linumbaan ni Rivera ti sarsarunnuenda a truck a manmanehuen ni Christopher Agustin, 41-anyos, residente ti Barangay Baresbes, Dingras, Ilocos Norte kasaruno iti pannakasagid ti kasinnabatda a bus a manmanehuen ni Dennis Virrey, 47-anyos, residente ti Lipa City, Batangas.
Gapu iti daytoy natumba ti motorsiklo ken naatalan ti nasao a truck ti ulo ni Rivera a puon ti dagusna pannakatay.
Adda metten iti natalged a kasasaad idiay ospital ni Oredina kalpasan a mataming dagiti sinagrapna a sugat iti bagi.
Naammuan nga agpada nga awanan ti suot a helmet dagiti nasao a biktima idi a napasamak ti aksidente.
