LA UNION – Natayen idi a maiturong idiay ospital ti maysa a baro a nalmes iti karayan idiay Barangay Baraoas Sur ili ti Naguilian, La Union.
Nabigbig ti 36-anyos a biktima a ni Richard Dumpit, residente ti Barangay Central West idiay ili ti Bauang, La Union.
Naammuan ti Bombo Radyo manipud iti Naguilian Police Station, maipagarup a nagturong idiay karayan ti biktima tapno agdigos kabayatan nga adda iti kangitingitan ti panagrambak iti birthday party dagiti gagayyemna.
Idi a madlawan iti kakaddua ti baro a nagpukaw daytoy iti karayan ket nagkiddawda iti tulong manipud ti lifeguard a nabigbig iti nagan a Pedro Castillo.
Binatok iti life guard ti karayan nga addaan ti kauneg a 10 a kadapan kasaruno iti pannakadiskobre kenni Dumpit nga adda iti uneg ti danum.
Dagus a naiturong iti Naguilian District Hospital ti biktima ngem maideklara daytoy a dead on arrival ti doktor.
