LA UNION – Madama ita a maob-obserbaran idiay ospital ti maysa a baro a naalaw manipud ti pannakalmes idiay baybay ti Barangay Taberna, ili ti Bauang, La Union.
Nabigbig ti biktima a ni Dennis Flores, 32, residente iti syudad ti Baguio.
Iti pannakiuman ti Bombo Radyo ken Maj. Rogelio Miedes, hepe ti Bauang Police, kinunana a nasarakan laengen ti kakabagyanna ti nasao a biktima a tumtumpaw iti baybay kalpasan a timmapog daytoy.
Naipaayan ti first aid ni Flores sakbay a naiturong iti ospital.
Sigun kenni Miedes, maipagarup a nakainom ti biktima sakbay a nagdigos daytoy iti baybay.
Gapu ti nasao a pasamak, plano ita ti pulisya a kasarita dagiti maseknan nga opisyal ti barangay ken dagiti mangimatmaton ti beach resorts tapno saan a maulit ti pasamak.
Nagpanawagan pay ni Miedes kadagiti barangay officials nga adda iti coastal areas a siputan wenno pakdaaran dagiti bisita a maisarsar-ong lalo no nakainom dagitoy.
