LA UNION – Natay iti 38-anyos a baro kalpasan a maatake ti puso bayat a nakalugan ti motorsiklo.
Nabigbig iti biktima a ni Manuel Casuga, residente ti Barangay Narra Oeste, San Fernando City, La Union.
Maibasar iti report, nakalugan ti biktima iti motorsiklo a man-manehuen ti managan Ruben Cariño, 61, residente ti Barangay Sagayad ditoy met laeng syudad, idi kellaat a matumba ti biktima.
Inturong ni Cariño ti biktima iti maysa a pribado nga ospital ket kinumpirma iti doktor a natay ni Casuga gaputi cardiac arrest wenno atake ti puso.
Sakbay ti insidente, pinagkedkedan nga immuna ti driver nga ilugan ti biktima idi agpara daytoy ken agpat-patulod iti balay da, ngem idi malabasan na manen iti maikadwa a gundaway, ket pinatgan na nga iluganen daytoy, ngem isu metten ti pannaka-atake na iti puso.
Napasamak ti insidente iti kalsada a sakopen ti Sitio Gabaldon, Barangay Tanqui, San Fernando City.
