ARINGAY, La Union – Isagsaganan ti pulisya iti kaso kontra ti maysa a baro a natiliwan iti droga ken bala ti paltog idiay Barangay Sta. Lucia, ili ti Aringay, La Union.
Nabigbig ti 37-anyos a suspek a ni Michael Antolin, residente ti nasao a lugar.
Naammuan ti Bombo Radyo manipud ti Aringay Police, natiliw ti suspek babaen iti panangisirbi ti search warrant nga inyatnag ni Jugde Ethelwolda A Jaravata ti Regional Trial Court Branch 32 a nakabase idiay ili ti Agoo a napetsaan iti April 05, 2019.
Iti panangalikad dagiti pulis iti balay ti suspek ket nakompiskar iti innem a sachet a naglaon iti maatap a shabu nga agbalor iti P1,800 ken 10 a pidaso a bala para ti M16 armalite riffle.
Kabayatanna, napaay met ti pulisya a masarakan iti maipagarup nga ikot a paltog ti suspek.
Agtultuloy iti imbestigasyon dagiti otoridad tapno maammuan ti nagalaan ti suspek kadagiti nasao a banag nga agpapaay ita kas ebidensya kontra kenkuana.
