LA UNION – Nasarakanen ti bangkay ti 17-anyos a baro nga immunan a naipadamag a naiyanod iti karayan idiay Brgy. San Juan East, Aringay, La Union.
Iti pannakiuman ti Bombo Radyo kenni Station Commander Alois Morales ti Coast Guard-La Union, kinunana a kadduada ti pulisya ken sumagmamano a residente iti nakasalaw ti bangkay ni Frenz Joe Frigillana, 17, idiay paset ti Sitio Dirana, Brgy. Poblacion ti nasao nga ili.
Maipalagi, nagturong ti biktima ken dagiti gagayyemna idiay karayan tapno agsagap ti lames idi kellaat nga inyanod daytoy ti napegges nga ayus ti karayan.
Kabayatanna, sigun pay kenni Morales, agtultuloy met a sapsapulen ti Philippine Coast Guard (PCG) ti mangngalap a ni Jon Jon Carlos Medriano, residente ti Fishermen’s Village, Barangay Poro, syudad ti San Fernando, La Union.
Naammuan manipud iti pamilya ni Medriano, ala-3 ti parbangon idi July 25, 2021 a timmapog daytoy ti baybay tapno agkalap ngem napaay isuna a makaawid.
