LA UNION – Impaganetget ni Bauang, La Union Mayor Menchi de Guzman a masapul a suruten iti protocol maipapan ti panagparte iti baboy.
Daytoy ket laksid nga adda dagiti sumagmamano a hog raiser ti agkidkiddaw iti pammalubos ti lokal a gobyerno nga uray saanen nga idalan ti municipal slaugther house dagiti baboy a maparti nga agtaud iti barangay.
Sigun kenni Mayor de Guzman, agtalinaed iti takder ti munisipyo a suruten iti protocol maipapan ti panagpartian ti baboy gapu pay laeng iti pangta ti African swine fever (ASF).
Kinuna ti alkalde, ikagumaan iti lokal a gobyerno nga idanun dagiti tulong kangrunaan iti taraon kadagiti agkasapulan lalo ita a panawen ti krisis gapu iti maipatpatungpal nga enchance community quarantine kontra iti panagwaras ti coronavirus diseases (COVID-19).
Mainaig iti daytoy naammuan ti Bombo Radyo, sumagmamano nga agtartaraken iti baboy ti nasao nga ili ti nangipeksa iti tarigagay ken agkidkiddaw ti pammalubos manipud iti gobyerno a partien ti tarakenda.
Dagiti sumaganad a rason iti agtartaraken ket tapno ipautang iti karne kadagiti kabarangayanda nga apektado ti community quarantine.
Adda met iti nangibaga nga ibunongda a libre iti karne kadagiti kaarruba, ken gapu ta limitado wenno bassit iti magatang a suplay ti feeds a pagpakan kadagiti taraken a baboy.
