LA UNION – Ngimmatu wenno nasursurok pay ngem doble iti ngimmatuan ti bilang dagiti recipients iti kalkalpas a Bombo Medico 2019 ti Bombo Radyo La Union.
Aganay 133% iti ngimmatuan dagiti recipients nga immawat ti libre a serbisyo iti medical, dental, kangrunaan na iti opta, ken dadduma pay a serbisyo kas iti libre a pukis, feeding program, ken pannakaibunong dagiti tsinelas kadagiti agkasapolan.
Manipud iti sigud a 1,623 a recipients idi 2018, ita a tawen ket dumanon iti pakabuklan a 3,776 dagiti recipients, manipud iti quota for 2019 a 1,700.
Iti biang ti medical, umabot iti 791 dagiti na-check up ken naipaayan ti agas; iti dental – 229; iti optical – 698; ken pakabuklan a 2,058 iti dadduma a serbisyo.
Naisayangkat ti Bombo Medico 2019 ti Bombo Radyo La Union iti La Union National High School ditoy syudad ti San Fernando, idi kalman, July 14, 2019.
Mainaig ti daytoy ket rinaem ti PMFTC ken dadduma pay a volunteer organization iti nasao a ganwat ditoy syudad gapu iti kina-adu dagiti attendees a nagturong iti venue tapno ag-avail iti libre a serbisyo.
Segun kenni Miss Bibeth Santiago, communications manager ti PMFTC Inc, a babaen iti social responsibility arm da a maaw-awagan ti EMBRACE, ket lima itan a tawen a sup-suportaran da iti BOMBO MEDICO ti Bombo Radyo Phils.
Malaksid iti Bombo Radyo La Union, immunan a sinuportaran da iti napalpalabas a Bombo Medico ti Bombo Radyo Cagayan de Oro (Cdeo), Bombo Radyo GenSan, Bombo Radyo Dagupan, ken Bombo Radyo Tuguegarao.
Iti PMFTC babaen iti EMBRACE iti maysa kadagiti organisasyon nga agidon-donar iti adu nga agas iti Bombo Medico.
