LA UNION – Inlawlawag ti Bureau of Fire Protection (BFP) La Union a mangirekrekomendarda laeng iti umno a klase ti fire extinguisher para kadagiti establisimiento, ngem saan iti espesipiko a brand.
Segun kenni FSUPT Bonifacio C. Sacatrapos, Jr., Provincial Marshal, nasken a maiturong ken maipakaammo kadagiti occupant wenno agtagikua ti establisimiento ti umno a klase ti fire extinguisher gapu ta adu kadakuada ti awan pay iti umdas nga ammona maipanggep iti daytoy, ken tapno masigurado nga epektibo iti maaramat a fire extinguisher no adda ti uram.
Inlawlawag pay ti ahensia a nakadepende iti irekomendarda a klase ti fire extinguisher iti kalawa ti building ken iti hazard content wenno kita ti peggad nga adda iti uneg daytoy. Kayatna a sawen, agdepende iti klase ti establisimiento ken kadagiti materyales nga adda iti unegna iti maipili a fire extinguisher.
Kabayatanna, impaganetget ti BFP nga iti kaadda ti fire extinguisher ket maysa a kangrunaan a requirement iti fire safety inspection. Awan ti aniaman nga establisimiento ti ma-exempt iti paglintegan, kas maibasar iti mandato ti BFP babaen ti Fire Code.
Palagip met ti ahensia iti publiko a makikoordinar iti opisinada tapno makaala ti umno a pannakaammo ken giya maipanggep iti panagsagana ken panangsalaknib kontra ti uram. (Report by Bombo Jordan)
