Nagyaman ti Bureau of Fire Protection San Juan agsipudta awan iti nailistada a pasamak nga uram wenno nadundunor gapu iti paputok kabayatan iti panagselebrar ti Paskua idi kalman, Disiembre 25.
Segun kenni Fire Senior Inspector Iren C. Borja, iti assessment da iti ili ket awan ti casualty wenno didigra a napasamak isu nga agtultuloy da nga agbanbantay tapnu agtalinaed iti kinatalged ken kinakapia iti lugar.
Adda met iti Oplan Paalala: Iwas Paputok a programa ti BFP ken agdama a naka-red-alert dagiti amin a pwersa manipud Disiembre 23 agingga Enero 22, 2026 a mangipalpalagip kadagiti umili nga agtalinaed a natalged iti panagrambak ti holiday season.
Nagpalagip ni Fire Senior Inspector Iren C. Borja a liklikan ti ‘electrical overload,’ saan nga agay-ayam ti apoy dagiti ubbing, ken liklikan ti ‘unattended cooking’ wenno panangibati kadagiti ilulutluto tapnu maiwasan iti peggad ti uram.
Inbinglay pay ti opisial a nangipaay da dagiti “torotot” kadagiti ubbing tapno saanda a makausar iti illegal a paputok a mabalin a makadangran kenkuada.
