Nalpasen iti bicameral conference committee meeting para iti pinal a bersion ti 2026 national budget itay alas-2:20 ti parbangon.
Tinalantan ti Senado ken House of Representative dagiti sumagmamano nga amendment ti 2026 General Appropriations Bill a dimmanon ti innem nga aldaw manipud Disiembre 13 aginggana ita nga aldaw, Disiembre 18.
Indauluan da Senate Finance Committee Chairperson Sherwin Gatchalian ken House Appropriations Chair Mikaela Suansing iti bicameral meeting.
Nagbalin a naisangsangayan iti bicameral conference ita a tawen agsipudta daytoy iti umuna a gundaway a naipabuya live manipud iti sigud a closed-door.
Ti P6.793- trillion a 2026 General Appropriations Bill ket nakatuding a maipasa kenni Presidente Ferdinand Marcos Jr. tapno maaprobaran.
Agtalek met ni Senate Committee on Finance Chairman Senador Sherwin Gatchalian nga iti maipasa a 2026 national budget ket nalinis manipud iti korapsion ken sumungbat iti pagkasapulan dagiti umili.
Kenunana pay nga iti singasing a pondo ket standard para iti naan-anay a tranparency.
Mamati met isuna nga awanen ti overpriced materials iti uneg ti proposed budget ti Department of Public Works and Highways (DPWH) kalpasan a nabaliwan a makuenta iti gastos para iti nasurok-kumurang 10,000 projects nga apektado iti panagkissay ti Construction Materials Price Data (CMPD) — a nagresulta iti matipid a P20.7 billion.
Kiniddaw ni Public Works Secretary Vince Dizon nga isubli iti P45 billion ti ahensia tapno masigurado a maipatungpal dagiti proyekto ngem pinagkedkedan dagiti sumagmamano a senador gapo iti isyu ti presio ken gastos.
Nupay kasta ket naaprobaran iti DPWH budget eksakto nga ala-1:12 itay parbangon.
Kabayatanna, ibilang ni House Appropriations Committee Chair Mikaela Suansing a naisangsangayan iti panagleppas ti deliberasion ti bicam kalpasan a maisapubliko ti dua a kongreso iti 2026 national budget dagiti ahensya ti gobyerno.#
