Manamnama nga ipatungpal manen dagiti kompania ti lana iti dakkel a panagngato ti presio dagiti produkto ti petroleo inton sumaruno a lawas.
Maibasar iti umuna nga uppat nga aldaw a panaggaraw ti Mean of Platts Singapore (MOPS) ken foreign exchange, mapattapatta a ngumato iti presio ti diesel iti ₱6.00 agingga iti ₱6.50 iti kada litro ken ti gasolina iti ₱5.50 agingga iti ₱6.00 iti kada litro, segun iti pattapatta dagiti industria.
Segun kadagiti suppliers iti industria ti lana, iti manamnama a panagngato ket gapu iti kabaruan a panagngato ti presio ti krudo iti sangalubongan a merkado gapu iti kumarkaro a tension idiay Middle East.
Karaman kadagiti kangrunaan a rason dagiti pannakasinga iti panaglabas dagiti barko idiay Strait of Hormuz ken iti kumarkaro a pangta iti seguridad idiay Bab el-Mandeb Strai, a mangigubgubuay ti panagbuteng iti sangalubongan a suplay ti lana ken produkto a petroleo.
Kadawyan nga ipak-pakaammo dagiti kompania ti lana iti linawas nga adjustments tunggal aldaw ti Lunes ken maipatpatungpal dagitoy iti aldaw ti Martes.
Idi Hulio 21, nangipatungpal dagiti kompania ti lana iti panagngato ti presio iti ₱3.65 iti kada litro ti gasolina, ₱10.68 iti kada litro ti diesel, ken ₱11.77 iti kada litro ti kerosene, maibasar iti pakaammo ti Department of Energy (DOE).
Kabayatanna, impanamnama ti DOE nga agtaltalinaed nga umdas ti suplay dagiti petroleum products ditoy pagilian iti laksid ii agtultuloy a panagngato ti presio iti international a merkado.
Segun iti ahensia, nasurok a 45 nga aldaw ti imbentaryo ti Pilipinas iti suplay ti lana, nalablabes ngem iti naikeddeng a minimum a 30 nga aldaw.###
