Manamnama a maaddaan ti dakkel a kissay iti presio ti produkto a petrolio inton sumaruno a lawas, maibasar iti uppat nga aldaw a garaw ti Mean of Platts Singapore (MOPS) ken foreign exchange trading.
Mapatta-patta a bumaba iti presio ti diesel ken gasolina ti ₱4.50 agingga ₱5.00 kada litro, segun iti maysa a source manipud iti industria ti langis.
Kenuna ti source a bimmaba iti presio ti langis iti sangalubongan a merkado gapu iti kabaruan a namnama iti diplomatiko a panagdur-as ti saritaan iti nagbaetan ti Estados Unidos ken Iran, a nangpababa iti geopolitical risk premium.
Nakatulong met ditoy iti panagkapsut ti supply premium ti diesel ken gasolina iti Asya, nupay agtaltalianed dagiti peggad iti ruta pangbaybay iti Red Sea.
Innayon pay ti source, nakatulong met iti panagngato ti balor ti piso kontra iti dolyar ti Estados Unidos ita a lawas tapno ad-adda a maibaba iti manamnama a presio dagiti produkto a petrolio iti pagilian.
Irakrakurak dagiti kompania ti lana dagiti price adjustments da tunggal Lunes, a kadawyan a maipatpatungpal iti kabigatan na.###
