Dumanonen ti 41 iti naipadamag a bilang dagiti natay gapu iti bagyo ken epekto ti habagat, manipud iti 39 a nairekord idi Huebes, segun ti National Disaster Risk Reduction and Management Council (NDRRMC).
Kaadduan a bilang ket manipud Cordillera Administrative Region (CAR) nga addan ti 15, sinaruno ti CALABARZON nga addaan ti 10, ken Central Luzon nga addaan ti lima. Uppat met iti pimmusay iti Ilocos Region, tig-tallo idiay MIMAROPA ken National Capital Region (NCR), ken maysa iti Negros Island Region (NIR).
Agtaltalinaed iti 18 dagiti nadangran ken tallo iti mapukpukaw, bayat nga agtultuloy a makapadpadas ti panaglayos dagiti 609 a lugar ditoy pagilian.
Kaaduan kadagiti nalayus a lugar ket adda iti Central Luzon, a dimmanon iti 541, sarunuen ti CALABARZON, Ilocos Region ken NCR.###
