BR LA UNION – Umaboten iti 13 ti bilang dagiti natay gapu iti agtultuloy a Wildfire idiay Los Angeles County idiay California.
Maibasar iti immuna a report dagiti otoridad, walo kadagiti nairekord a natay ket manipud iti lugar ti Eaton Fire idinto a lima ti nairekord idiay Palisades.
Kinumpirma ni County Sheriff Robert Luna iti 11 kadagiti natay ken inwaragawagna a 13 ti agtaltalinaed a mapukpukaw ken sapsapulen pay laeng.
Kabayatanna, 180,000 nga umili ti naapektaran iti wildfire ken agtaltalinaed kadagiti evacuation centers.
Dagiti nauram ken dimmapo nga imprastruktura ket umaboten ti 12,300 a babbalay nga aggatad iti saan a bumaba iti $10 million US dollars.
Agtultuloy ti panangsebseb dagiti otoridad iti uram a nangrugi idi Enero 7.
