Nasurok a 116 nga indibidual iti natay, karaman dagiti pito nga ubbing, iti agtultuloy a protesta kontra gobierno idiay Iran, segun ti U.S.-based Human Rights Activists News Agency (Hirana).
Maibasar iti datos ti Hirana, dumanon ti 2,638 nga indibidual iti naarestar iti agtultuloy a tignay-protesta a dumanonen ti maika-14 nga aldaw.
Natay met iti kangitingitan ti protesta dagiti 109 a kameg ti security forces.
Mainaig iti agtultuloy a kinaranggas, naipadamag ti dandani 60 nga oras a panannakaputed ti Internet idiay Iran, a mapapati a maysa nga addang tapno malapdan iti pannakaiwaras ti impormasion ken ti koordinasion dagiti raliyista.
Nangrugi dagiti protesta iti maudi a Domingo ti Disiembre, kalpasan a nagmartsa dagiti umili idiay Tehran maibusor iti ngumatngato nga implasion ken ti agtultuloy a panagbaba ti balor ti Riyal.
Kabayatan ti lumawlawa a protesta, nagbalin a nabatad iti waragawag kontra iti gobierno, karaman dagiti arungaing a mangal-allukoy kadagiti estudiante nga agbalin a timek dagiti tattao ken ti panawagan a tinnagen iti Islamic Republic.
Indauluan met ti Supreme Leader a ni Ayatollah Ali Khamenei iti naisayangkat nga operasion tapno gibusan dagiti mapaspasamak a rally, ken naipadamag a nangaramat pay daytoy ti tear gas ken sumagmamano a panangpaputok ti paltog.
Ibagbaga dagiti opisial a silulukatda a dinggen dagiti arungaing dagiti umili maipapan iti ekonomiya.
Ikonkonektar da nga iti mapaspasamak a riribuk kadagiti “rioter” ket gapo iti maipagarup a pannakibiang dagiti ganggannaet a pagilian, partikular ti Estados Unidos ken Israel.
Kabayatanna, iti naisina nga statement, impaganetget ni Presidente Masuod Pezeshkian nga adda ti pakainaiganna dagiti gangganaet a terorista iti riribuk.
Inkari ni Pezeshkian nga urnusen ti gobierno iti kumarkaro a problema ti ekonomiya ti pagilan.
Nagballaag met ti Iran kontra kadagiti aniaman nga interbension manipud kadagiti gangganaet.###
