Dumanonen iti agarop 20 nga indibidwal iti pimmusay ken nasurok a 170 dagiti nadundunor kalpasan iti panagsuwwek ti maysa a fighter jet ti Bangladesh Air Force iti maysa a pagadalan idiay Dhaka.
Maipalagip nga iti insidente ket napasamak iti Milestone School and College, maysa a pribado a pagadalan.
Kaadwan kadagiti biktima ket dagiti ubbing nga estudyante a paawid pay laeng manipud iti klase idi nagsuwwek iti Chinese-made F-7 BJI jet.
Segun iti militar, iti piloto a ni Flight Lieutenant Towkir Islam ket adda iti maysa a training mission idi nakapasar ti mekanikal nga aberya. Daytoy met iti umuna a solo flight ti nasao a piloto kas maibasar iti statement ti Uncle na.
Maipagarop a ginandat ti piloto nga iyadayo iti eroplano iti natao a lugar ngem nagsuwwek latta daytoy iti pasdek ti pagadalan.
Kabayatanna, manipud 8 anyos agingana 14 anyos dagiti nadundunor, segun iti ospital a nakaiturungan dagiti biktima bayat a pito a bangkay iti saan pay a nabigbig.
Nagdupodop met dagiti kabagian dagiti biktima kadagiti ospital bayat a dagiti volunteers ket nangisayangkat ti blood donation drive.
Indeklara metten ti gobierno sadiay kas national mourning ita nga aldaw.
Nangipeksa ti panakiladingit ni Indian Prime Minister Narendra Modi ken impanamnama a nakasagana da a tumulong.
Iti napasamak nga insidente ket maibilbilang a kakaroan nga aviation disaster idiay Bangladesh manipud pay idi 1984 a nakatayan dagiti 49 nga indibidwal gapo iti maysa a commercial flight crash.#
