Bimaba iti nasurok-kumurang 450,000 iti bilang dagiti suldado ti pagilian wenno nakissayan ti 20% iti napalabas nga innem a tawen, segun iti Ministry of National Defense ti South Korea.
Itudtudo dagiti otoridad kas kangrunaan a rason ket iti agtultuloy a panagbaba ti birth rate nga iti agdama ket 0.75 tunggal babae a kababaan iti intero a lubong.
Agtaltalinaed nga obligado iti military service idiay South Korea agsipudta saan pay a pormal a nagleppas iti gubat daytoy kontra North Korea, nga addaan ti mapatta-patta a 1.3 million active soldiers.
Segun iti maysa a panagadal, kasapulan ti South Korea ti saan a bumaba iti 500,000 a suldado tapno epektibo a madepensaan iti pagilian manipud iti posible a panagraut ti North Korea.
Iti agtultuloy a panagbaba ti bilang, kenuna dagiti eksperto nga adda iti “narigat a posisyon” iti pagilian seknan iti national defense.
Manipud 2006, nakissayan iti bilang dagiti military divisions manipud 59 ken bimaba iti 42, rason ti panagtitipon wenno panagsisina dagiti sumagmamano a unit.
Kas sungbat, agtultuloy a ngumatngato ti defense budget ti pagilian, ken ita a tawen ket dimanon ti nasurok $43 billion iti pondo ti gobierno para iti militar – dakdakkel maiyaring iti pakabuklan a GDP ti North Korea.
Numanpay mandatory iti military service kadagiti lallaki, agtaltalinaed a kontrobersyal iti sistema, kangrunaan iti epekto daytoy iti karera dagiti agtutubo.
Adda dagiti konserbatibo a dasig iti nagpanawagan nga iraman met dagiti babbai iti conscription iti kangitingitan ti krisis iti populasyon.#
